Gasin’ny 2017

Ny volana jona, ankoatry ny maha iray volan’ny ankizy azy sy ny fankalazana ny fetin’ny Fahaleovantena, dia iray volan’ny teny malagasy. Aderadera sy omena lanja manokana izay gasigasy rehetra mandritra izany. Dia eo no resahana be indrindra ny hoe « maha Malagasy », ary mirary ny rehetra mba hiverenan’izany. Saingy, rehefa miteny hoe « maha-malagasy », gasy oviana ary gasy manao ahoana no resahina. Ny tamin’ny andron-dRalambo, ireo nijaly nandritry ny fanjanahantany, sa ireo nidina an-dalambe nandritry ny korontan’ny 2009 ? Ireo nisalaka ve, sa ireo nitafy lamba soga sa ireo manao pataloha jean ? Ireo eto ankibon’Imerina ve, sa ny any Androy, sa aiza ho aiza eto amin’ity Nosy lehibe ity ? Vanim-potoana sy toerana ary fomba fiaina samy hafa, saingy raha anontaniana ireo dia samy hilaza fa tena Malagasy avokoa, ary tena izy fa tsy mba sarintsariny. Ny kolontsaina dia miova manaraka ny habaka sy ny fotoana satria zava-manan’aina. Isika miaina amin’izao taona 2017 izao dia mbola Malagasy ihany, fa miaina araky ny vanim-potoana misy atsika sy ny zava-misy, ary manaraka ny rivotra mitsoka amin’izao tontolo izao. Tsy ilaina akory ny mandeha alavitra na miantsoro-mianotra amin’ny fotoana raha hitady ny maha-malagasy. Ny gazety-boky no comment® dia miezaka hatrany manome lanja sy vahana manokana ny kolontsaina sy ny zava-misy eto amintsika amin’izao taonjato misy antsika izao. Mihoatra noho izany, efa miresaka sahady izahay ny mety hisy eto Madagasikara amin’iny taonjato faha-22 ho avy iny. Tsy milaza anefa izany fa hadinoina ny lasa. Saingy tsy anaovana resabe izany rehetra izany fa ianao mpamaky ihany dia efa mahatsapa izany ezaka izany.