Lettres de Lémurie – Takelaka Tsara Soratra / Soanampoinimialy, Zato
28 juin 2018 - Cultures commentaires   //   222 Views   //   N°: 101

Tonga indray ny volana jona, volan’ny teny malagasy. Iray isaky ny 12 volana ka aleo araraotina : tonga dia boky anakiroa no ho resahantsika, samy navoakan’ny RanjaSoa Publishing, izay trano famoaham-boky mihetsiketsika be ary mitan-tsoroka ny sehatry ny haisoratra malagasy, na avy lavitra aza.

« … Il y a un autre monde dehors qui est à nous aussi »
Harlem, Eddy Harris.

Takelaka Tsara Soratra,
gazety bokina haisoratra, Antananarivo,
Washington DC, laharana faha-2, mey-jona-jolay
2018, 113 takila.

Orinezaky ny RanjaSoa Publishing ny Takelaka Tsara Soratra. Hoy i Mialy Ravelomanana sy i Soamiely Andriamananjara, mpamorona sy mpiandraikitra, mamaritra azy : sady Ambatonamelankafatra, mirakitra lahatsoratra voakaly, na sombintantara na tantara foronina na tononkalo na lahatsoratra fanadihadiana hafa, no Ambohipihaonana ho an’ny mpamaky sy ny mpanoratra, ireo vao misandratra sy ireo efa kalaza.

Misy telo-polo mahery izy ao amin’ity laharana faharoa ity. Misy ao manoratra tononkalo sy poezia, misy praozy sy riankalo, na koa tantara sy ainga hafa ; misy kosa no nametraka pika sary sy kisary. I Dwa no nandravaka ny fono atrika.

« Lohahevitra maro sy malalaka fa matetika miompana amin’ny fitiavana no hotetezin’izy ireo », hoy i Hanitr’Ony, tonia, ao amin’ny fanolorany. Satria « olon’ny fo ny Malagasy, manana ilay emboka mampamerovero sy mahamamy ny miaina izay, tsiky hatrany no hateraky ny andalan-teny misy ny fitia sy ny fihavanana ».

Raha ny fitiavana nefa ny vakampotsin’ny tantara dia tsy takony na arentiny mihitsy aza ny fiaraha-monina efa miova loko. Vorika ohatra, nosoratan’i Mina, dia tantarampitiavana somparan’ny ngetroka mahalala olona ambony ka mitondra ireo mpifankatia hatrany an-tranomaizina amin’izao fanjakan-kolikoly izao. Miasarotra tokoa angaha ny fiainana ka mahatonga ny sasany hiery anaty nofy toa ilay tovovavy ao amin’ny sombin-tantara nosoratandRavorombato, Ahy izy, ahy irery, mitory fitiavana asesiky ny fiondanam-boky. Tsy latsaka izay ny fitia voararin’ny fahafatesana tantarain’Andrianimerina ao amin’ny Angatra velona.

Tsy mena-mitaha amin’izany ny tononkalo maro atolotra ao amin’ity laharana faharoan’ny Takelaka Tsara Soratra ity. « Mamoha ny matory ao amin’ny maro ny Poezia, hoy i Narilala, ary tontolo ihoarana mankany amin’ny hatsarana … »

Nahafinaritra ahy manokana ny anganon’i Hanitr’Ony nampitondrainy lohateny hoe Liana. Noraketiny ao ny vakoka malagasy ary tanisainy ny soa-toavina nentin-drazana.

Toa namakivaky ny tsenan’Antananarivo vao maraina mihitsy aho namaky ny sombin-tantara nosoratan’i Hemerson Andrianetrazafy.

Na miainga amin’ny andavanandro aza dia « rarin-teny voahosotra hitsabo ny fo malahelo ho amin’ny fanantenana ary mampatsiahy ny ambadikin’ny misy ». « Zava-panahy » tokoa ny haisoratra araka ny anatr’i Narilala ary tsy mandraraka ilo mby andoha ireto mpanoratra. Ezaka iray no mampiombona azy ireo : ny hifehy ny asa-soratra voakaly. Hoy Ranöe « fa ny soratro no sambo / Hitondra anao hitety onja / Onja maro sesehena / Onja nofy, onjam-piainana / Ojam-peo sy taraina / Onjan-kevitra sy saina ». Hoy ny teny filamatrin’ity gazety boky : « Aza mijanona manoratra – Aza mitsahatra mamaky ». Dia ahoana koa ny manaraka ?

Soanampoinimialy, Zato,
amboaran-tononkalo, Antananarivo,
Washington DC, 2018, 105 takila.

Tsy zohina amintsika eto intsony ity mpanoratra sy poeta mitogaigy any dilambato, sady andry iankinan’ny RanjaSoa Publishing ity. Efa namoaka amboaran-tononkalo izy tamin’ny 2016, Volana sy vinany, ary amboarantsombintantara roa, Soratsarotra, 2015, sy Tantaraiko anao, 2017.

Tononkalo zato sahisahy sy aingam-panahy maditra sy masiaka nefa mateza vakiana no ato. Resaka henjana fa tsy tsianjerin-jazabelelo. Ary soram-pitiavana ihany koa.

Hoy i Soanampoinimiely : « Soa ihany ianao fa nisy / raha tsy izay dia ho hafa mihitsy / ny fandehan’ny tantara. / Soa ianao fa tsy nitsitsy / tsy nanaiky fa nisisi- / ka namonjy farafara. / Soa fa nisy ianao malala / Soa ianao tsy nety niala. » Mamakia finaritra ô.

COMMENTAIRES
Identifiez-vous ou inscrivez-vous pour commenter.
Fermer